धनगढी । कैलालीमा अज्ञात समूहले गोली चलाएको छ । धनगढी उपमहानगरपालिका–९ मा गोली चलाइएको हो ।
सोमबार राति धनगढी–९ स्थित नेपाल–भारत सीमा क्षेत्रमा पर्ने जुगेडामा दुई राउन्ड गोली प्रहार गरिएको थियो । आज बिहान ३ बजेतिर सोही क्षेत्रमा पर्ने शिवरामनगर टोलमा पनि गोली चलाइएको छ ।
स्थानीय प्रजापति विष्टको घरमा चोरी गर्न आएको समूहको प्रतिकार गर्न खोज्दा ‘चोर’हरूले गोली प्रहार गरेको घाइते विष्टले बताएका छन् । गोली लागेर विष्ट सामान्य घाइते भएको जिल्ला प्रहरी कार्यालय कैलालीका प्रहरी प्रवक्ता प्रहरी नायब उपरीक्षक बेदप्रकाश जोशीले जानकारी दिए ।
स्थानीयको घरबाट ‘चोर’हरूले अटो रिक्साका चार ब्याट्री चोरेर लगेका छन् । विष्टमाथि गोली प्रहार गरेपछि स्थानीयले होहल्ला गरी सो समूहलाई लखेट्दा अर्को राउन्ड फायर गरिएको विष्टले बताए ।