Skin_Hospital_Dhn

सुन्तला बिक्री नहुँदा बाजुराका किसान मर्कामा

बाजुरा: सुन्तला बिक्री नहुँदा बाजुराका किसान मर्कामा परेका छन् । किसानले उत्पादन गरेको सुन्तलाले कतै बजार पाएको छैन । कात्तिकमा पाकेको सुन्तला पुस महिनासम्ममा पनि बिक्री नभएको त्रिवेणी नगरपालिका–९, पैमाका धनराज उपाध्यायले बताए।

उनले भने, ‘सुन्तला बिक्री गरेर घरखर्च जोहो गर्ने भनेको थिएँ । अहिलेसम्म बिक्री नहुँदा मनमा चिन्ता पसेको छ ।’ सुन्तला पाकेर बारीमा पहेँलपुर देखिए पनि त्यसमा कसैको मन नलोभिएको भन्दै उनले जुन खेती गरे पनि केही नहुने भयो भन्ने मनमा चिन्ता लाग्न थालेको बताए।

उपाध्यायले गाउँमै सात सयभन्दा बढी रोपनीमा सुन्तला खेती छ । अहिले बिक्री गर्न समस्या भएको उपाध्यायको गुनासो छ । कृषि ज्ञान केन्द्रको पहलमा उपाध्यायले सुन्तला खेती गरेका हुन् । उनले गहुँ, धान र कोदो लगाउने जमिनमा सुन्तला खेती सुरु गरेका हुन् । गहुँ र धान फलाउने जमिनमा सुन्तला फलाएका उपाध्यायलाई बजारको समस्या देखिएको छ ।

गाउँमा कोल्डस्टोरको व्यवस्था छैन । यसरी किसानले उत्पादन गरेका वस्तु केही महिनासम्म राख्न सहज हुने गरेर कतैबाट कोल्डस्टोरको व्यवस्था भइदिए सहज हुने अपेक्षा उनको छ ।

यस जिल्लाको गौमूल गाउँपालिका, बडिमालिका र त्रिवेणी नगरपालिकामा सुन्तला उत्पादन हुने गरेको छ । यहाँ उत्पादन गरेका सुन्तलाले समयमै बजार नपाउँदा समस्या भएको गौमूलका सुन्तला किसान पारू रोकायाले बताइन् ।

सम्बन्धित
Loading...