धनगढी ।
कैलाली २ बाट निर्वाचित सांसद अरुण चौधरीलाई २० गते अदालतले कारागार चलान गरेको थियो । हिजो (आइतबार) उच्च अदालत दिपायलमा सांसद अरुण चौधरीलाई रिहा गर्न माग गर्दै परमादेश रिट दर्ता भएको थियो । सांसद अरुण चौधरीलाई रिहा गर्न माग गर्दै परेको रिटमा आज सुनुवाइ हुँदै छ ।
१९ माघमा प्रहरीले बाँकेबाट पक्राउ गरेर २० गते अरुण चौधरीलाई जिल्ला अदालत पेश गरिएको थियो ।
२०६६ भदौ ३ गते लु २ त २११ नम्बरको ट्र्याक्टर जलाएको भन्दै २०६७ भदौ २ कैलाली जिल्ला अदालतमा अरुण चौधरीसहित तीन जनाविरुद्ध मुद्दा दर्ता भएको थियो । सोही मुद्दामा २०७० वैशाख ९ गते कैलाली जिल्ला अदालतले चौधरीसहित पर्सराम चौधरी र वीर बहादुर चौधरीलाई जनही छ महिना कैद र ८ लाख १८ हजार ४२३ रुपैयाँ पीडितलाई उपलब्ध गराउने फैसला गरेको थियो ।
छ महिना कैद भुक्तान नगरेको भन्दै चौधरीलाई प्रहरीले १९ गते पक्राउ गरेको हो । यता चौधरी पक्षमा कानुन व्यवसायीहरूले सुनुवाइको मौका समेत नदिइ अन्याय पूर्ण फैसला भएको बताएका छन् ।
हिजो उच्च अदालत दिपायलमा जिल्ला अदालतको फैसला बदर गर्न र धरौटी राखेर रिहा गर्न माग गर्दै रिट दर्ता गरिएको थियो । आज १ नम्बरमा रहेको उक्त रिटमा सुनुवाइ हुने छ ।
