धनगढी ।
ट्राफिक पोस्टका ईन्चार्ज प्रहरी नायव निरीक्षक (सई) माथि छानविन गर्न माग गर्दै नेपाल पत्रकार महासंघ कैलाली शाखामा निवेदन परेको छ । कैलालीको त्रिनगर ट्राफिक पोस्टका ईन्चार्ज प्रहरी नायव निरीक्षक (सई) नरिभान साउँद माथि छानविन गर्न माग गर्दै नेपाल पत्रकार महासंघ कैलाली शाखामा निवेदन परेको हो ।
हुलाकमार्फत ‘जनआवाज धनगढी’को नामबाट आएको पत्रमा निवेदक ‘जनताको गुनासो र सही छानविन’ लेखिएको छ । यद्यपि आरोप पत्रमा ‘हामी टेक्टर, ट्रक, अटो तथा गाडी व्यवसायीहरुको माग’ भनेर उल्लेख छ । पत्रकार महासंघ कैलालीको नाममा आएको पत्रमा सई साउँदमाथि विभिन्न आरोप लगाउँदै छानविन गरि कारबाही गर्नुपर्ने माग गरिएको थियो ।
सई साउँद धनगढीस्थित दीपेन्द्र प्रहरी स्कुलको एकाउन्टेन्ट हुँदा भवन निर्माणका क्रममा विभिन्न नक्कली बीलहरु पेश गरि भ्रष्टाचार गरेको, त्रिनगर ट्राफिक पोष्टमा बसेर प्रत्येक टेक्टर, अटोलगायतका गाडीहरुमाथि अत्याधिक ज्यादती गरेको आरोप लगाइएको छ ।
भन्सारमा सवारी साधनबाट मासिक रुपमा असुली गर्ने गरेको आरोप लगाउँदै सई साउँदका विगतदेखिका क्रियाकलापलाई ध्यानमा राख्दै छानविन गरि बरखास्त गर्न माग गरिएको छ ।
यसैगरि विभिन्न बुँदामा सई साउँदको सर्टिफिकेट छानविन गर्नुपर्ने, दीपेन्द्र प्रहरी स्कुलको भवन निर्माण सम्बन्धमा छानविन गर्नुपर्ने, ट्राफिक प्रहरीको तालिम नगरि त्रिनगर ट्राफिकमा जान मिल्ने वा नमिल्नेबारे छानविन गर्नुपर्ने, चितवन काण्डबारे पुनः छानविन गर्नुपर्ने र त्रिनगर ट्राफिकको असुली धन्दाबारे छानविन गर्नुपर्ने माग गरिएको छ ।
यि आरोप बारे ट्राफिक प्रहरी त्रिनगर ईन्चार्ज साउँदलाई बुझ्दा आफुमाथी रिशिभी साँद्न यि आरोप लगाइएको बताएका छन् । साउँदले भने,“मेरो सबै कुराको मुल्याकंन गरेरै प्रदेश प्रहरी कार्यालयले मलाई यहाँ खटाएको हो, अहिले यही बिषयमा प्रदेश प्रहरी कार्यालय अत्तरियालेपनि छानबिन गरिरहेको छ, डि एसपीको कमाण्डमा छानबिन समिति गठन गरेर छानबिन भइरहेको छ, एदी म गलत भए कार्वाही भोग्न तयार छु, मेरो करियरमाथी धब्बा लाउनेगरी षडयन्त्र भइरहेको छ त्यसमाथी म दुखी छु ।”
