अछाम: अछामका दुई किशोरीको मृत्यु प्रकरणमा प्रहरीले दुईजनालाई नियन्त्रणमा लिएको छ। प्रहरीले अछामको ढकारी गाउँपालिकाबाट आइतबार साँझ उनीहरूलाई नियन्त्रणमा लिएको हो
परिवारका सदस्यले दिएको जानकारीका आधारमा शंकास्पद दुईजनालाई पक्राउ गरेको जिल्ला प्रहरी कार्यालय अछामका सूचना अधिकारी प्रहरी निरीक्षक टेकबहादुर देउवाले जानकारी दिए।
जिल्लाको ढकारी गाउँपालिका-८ का १५ वर्षीया सरस्वती खड्का र १४ वर्षकी इशरा खड्काको ढकारी गाउँपालिकाकै वडा नम्बर १ स्थित सुनघर सामुदायिक वनमा शनिवार साँझ फेला परेको थियो। शुक्रवार बिहान घरबाट बाख्रा चराउन गएका उनीहरू त्यही दिनदेखि सम्पर्कविहीन थिए ।
उनीहरूको शव क्षतविक्षत अवस्थामा अलग-अलग ठाउँमा फेला परेका थिए। मृतक सरस्वती फुपू र ईशरा भदैनी नाता पर्छन्। मृतकका परिवार र आफन्तले घटना शंकास्पद रहेकाले अनुसन्धान हुनुपर्ने माग गरेका छन्। प्रहरीले तालिम प्राप्त कुकुरको प्रयोग गरेर घटनाको अनुसन्धान गरिरहेको जनाएको छ।
