धनगढी: परराष्ट्रमन्त्री डा. आरजु राणा देउवाले हमास समूहको नियन्त्रमा रहेका नेपाली विद्यार्थी विपिन जोशीको रिहाइका लागि सक्दो प्रयास भइरहेको बताएकी छन्।
नेपाली कांग्रेस कैलालीको दोस्रो जिल्ला सम्मेलनको उद्घाटन समारोहलाई सम्बोधन उनले हमासको नियन्त्रणमा रहेका जोशीको रिहाइका लागि सकेसम्मको मिहिनेत भइराखेको बताइन्। उनले भनिन्, ‘सबै क्षेत्रबाट सरकारले पहल गरेको छ।हाम्रो चाहना विपिन सकुशल फर्केर आउन् भन्ने हो।’
नेपाली कांग्रेसको नीति मार्गदर्शन देश बनाउने भएको बताउँदै उनले सबै नेता कार्यकर्तालाई सकरात्मक सोचका साथ अगाडि बढ्न आग्रह गरिन्। उनले राजनीतिबाट मात्रै परिवर्तन ल्याउन सकिने बताउँदै आ–आफ्नो क्षेत्रबाट कर्तव्य पूरा गर्नुपर्नेमा जोड दिइन्।
एक अर्को प्रसंगमा उनले सामाजिक सञ्जालमा देशको बारे नकारात्मक टिप्पणी देखिए पनि अन्तर्राष्ट्रिय स्तरमा नेपालबारे सकारात्मक सन्देश दिने काम भइरहेको दाबी गरिन्। सुदूरपश्चिममा धेरै विकास निर्माणका काम भएको उनको दाबीको छ।
सम्मेलनमा पार्टीका केन्द्रीय सदस्य, पूर्व केन्द्रीय सदस्य, सुदूरपश्चिम प्रदेश कार्यसमिति, महासमिति सदस्य, महाधिवेशन प्रतिनिधि, क्षेत्रीय सभापति, पदाधिकारी, पालिका सभापति, पदाधिकारी तथा सदस्यको सहभागिता रहेको थियो।
