धनगढी: नेपाली कांग्रेसका महामन्त्री गगनकुमार थापाले नागरिकको असन्तुष्टिलाई प्रयोग गरेर राजावादीहरूले ‘आक्रोशको आगोमा रोटी सेक्न’ चाहेको टिप्पणी गरेका छन्।
कैलालीको धनगढीमा शनिबार आयोजित कांग्रेस सुदूरपश्चिम प्रदेशको प्रथम सम्मेलनको उद्घाटन समारोह सम्बोधनका क्रममा उनले सो टिप्पणी गरेका हुन्।
‘नागरिकहरूको यो असन्तुष्टिलाई, यो असन्तुष्टिबाट सिर्जना भएको आक्रोशको आगोलाई प्रयोग गरेर एकथरी जसले यो व्यवस्था आओस् भनेर कहिले चाहेकै थिएन, उनीहरू आगोमा रोटी सेक्न चाहन्छन्,’ महामन्त्री थापाले भने, ‘यसमा हामीले अचम्म मान्नुपर्ने कुरा केही छैन।’
यसका साथै उनले नेपाली राजनीतिको विषम परिस्थितिमा कांग्रेसलाई साथ दिएका नागरिकमा असन्तुष्टि देखिएको बताए। उनले माओवादीबाट लखेटिँदा र तत्कालीन राजा ज्ञानेन्द्र शाहले अधिकार खोस्दा कांग्रेसलाई साथ दिएका जनता अहिले पार्टीका प्रति असन्तुष्ट देखिएका बताए।
‘जसले ०६० सालमा माओवादीले लखेटेको बेलामा हामीलाई साथ दिए। जसले राजाले अधिकार खोसेको बेलामा हामीलाई साथ दिए । जसले संविधान सभा असफल भएको बेलामा हामीलाई साथ दिए। ती नागरिकमा आज असन्तुष्टि देखिएको छ,’ महामन्त्री थापाले भने।
