धनगढीः कैलाली बहुमुखी क्याम्पसको स्वतन्त्र विद्यार्थी युनियन (स्ववियु)मा नेपाल विद्यार्थी संघ (नेविसंघ) ले ३४ वर्षपछि विरासत फर्काएको छ।
सुदूरपश्चिम विश्वविद्यालयअन्तर्गतको आंगिक क्याम्पसका रूपमा रहेको कैलाली बहुमुखी क्याम्पसमा नेविसंघले बहुमतसहित नेतृत्व पुनः प्राप्त गरेको हो।
निर्वाचनको अन्तिम मत परिणामअनुसार सभापतिमा नेविसंघका उम्मेदवार सन्तोष पन्त विजयी भएका छन्। उनले ८२७ मत पाए। पन्त यसअघि स्ववियु सचिव थिए। उनका प्रमुख प्रतिस्पर्धी अखिल (क्रान्तिकारी) का पवन सुनारले ५५८ मत प्राप्त गरे भने वर्तमान सभापति रहेका अनेरास्ववियुका यमराज जोशीले ४२७ मत ल्याए।
यस्तै, एकीकृत समाजवादी निकट अनेरास्ववियूका उम्मेदवार सुनिलराज जोशीले ६८ र नेविसंघकी बागी उम्मेदवार अम्बिका चौधरीले ९२ मत प्राप्त गरे।
सचिव पदमा नेविसंघका ओमप्रकाश वस्ती निर्वाचित हुँदा कोषाध्यक्षमा अखिल (क्रान्तिकारी) का धर्मराज तिमल्सिना विजयी भए। नेविसंघकी उम्मेदवार प्रमिला शाह कोषाध्यक्ष पदमा चार मतले पराजित भइन्।
क्याम्पसमा कूल ३५०० बढी विद्यार्थी मतदाता रहेकोमा हालै सम्पन्न मतदानमा २ हजार ५७ मत खसेको थियो। केएमसीमा हालसम्म १४ जना सभापति निर्वाचित भइसकेका छन्। तीमध्ये ७ जना नेविसंघ, २ जना नेविसंघकै बागी र ५ जना अनेरास्ववियुबाट निर्वाचित भएका थिए।
नेविसंघले यसअघि २०४७ सालमा तपराज जोशीको नेतृत्वमा सभापति जितेको थियो। त्यसपछि २०५३ मा हरि रेग्मी र २०५५ मा प्रकाश बोगटी बागी उम्मेदवारीमार्फत विजयी भएका थिए। त्यसबाहेक २०५१ सालदेखि २०७९ सालसम्म स्ववियु सभापतिमा अनेरास्ववियुले विजय हात पारिरहेकोमा यो पटक नेविसंघले लामो समयपछि आफ्नो वर्चस्व पुनः स्थापित गरेको हो।
