चेन्नाई सुपर किंग्सलाइ तीन रनले पराजित गर्दै राजस्थान रोयल्स आइपिएलको शीर्ष स्थानमा उक्लिएको छ।
चेन्नाईको चिदम्बरम स्टेडियममा भएको खेलमा घरेलु टोली चेन्नाईमाथि जित निकाल्दै राजस्थान शीर्ष स्थानमा उक्लिएको हो ।
१७६ रनको लक्ष्य पछ्याएको चेन्नाईले २० ओभर खेलेर ६ विकेटको क्षतिमा १७२ रनमात्रै बनाउन सक्यो ।
चेन्नाईका लागि डेवन कोनवेले अर्धशतकीय पारी खेले । उनले ३८ बलमा ६ चौकाको मद्दतमा ५० रन बनाए ।
त्यस्तै अजिन्क्य रहानेले ३१ रनको योगदान गरे । कप्तान महेन्द्र सिंह धोनीले नटआउट ३२ रन बनाएपनि टोलीको हार टार्न सकेनन् ।
खेलको अन्तिम ओभरमा २ छक्का प्रहार गरेका थिए । बाँकी ४ बलमा एकएक रनमात्रै आउँदा नतिजा राजस्थानको पक्षमा पुग्यो । खेलमा रविन्द्र जडेजाले नटआउट २५ रनको योगदान गरे ।
बलिङतर्फ राजस्थानका रविचन्द्रन आश्विन र युजवेन्द्र चाहलले दुई–दुई विकेट लिए भने सन्दीप शर्मा र एडम जाम्पाले एकएक विकेट लिए ।
त्यसअघि टस हारेर पहिले ब्याटिङ गरेको राजस्थानले २० ओभरमा ८ विकेट गुमाउँदै १७५ रन बनाएको थियो ।
राजस्थानका लागि जोस बट्लरले ३६ बलमा १ चौका र तीन छक्काको मद्दतमा ५२ रनको अर्धशतकीय पारी खेले ।
त्यस्तै देवदत पाडिकलले ३३ बलमा ५ चौकाको मद्दतमा ३८ रनको योगदान गरे । रविचन्द्रन आश्विन र शिम्रोन हेटम्यरको ३०–३० रनको योगदान रह्यो ।
बलिङमा चेन्नाईका आकाश सिंह, तुसार देशपान्डे र रविन्द्र जडेजाले समान दुई–दुई विकेट लिए भने मोइन अलीले एक विकेट लिए ।
जितसँगै चार खेल खेलेको राजस्थान अंक तालिकाको शीर्ष स्थानमा उक्लिएको छ भने हार ब्यहोरेको चेन्नाई पाँचौं स्थानमा छ ।
